كل سنة وانت طيب

الصيف جه بدري أوي، في فبراير، وهفطس. بره الكشك شمس وجواه فرن. القايش كابس على أنفاسي. لسه فاضل شهرين على قلع الشتوي ولبس الصيفي. يا الله.. يا ولي الصابرين. اتفضل يا باشا، كل سنة وانت طيب. لو كل واحد وهو خارج يدين جنيه.. جنيه بس. الراديو صوته بيروح، عايز حجارة. لما الضهر يأذن هقول لحمادة الساعي يجي يقعد مكاني وأدخل اتوضا وأصلي، وأهو أقعدلي شوية في التكييف، وبالمرة أسأل مدام تهاني لو عندها حجارة. حتة سكرة والله مدام تهاني دي، أي حاجة بطلبها منها بتقول هشوفلك أو تديني قرشين. علشان كده بحط الطوبة أحجز لها مكان الصبح بدل ما تقعد تلف على ركنة. أستاذ حمدي بيتغاظ ويتزرزر.. طز. هو على طول متزرزر، ويوم آه يوم لأ فيه عميل شاتمه وضاربه كمان من كتر ما هو بارد وبيوقف المراكب السايرة.؛ السيستم واقع، أي حد يطلب منه حاجة، السيست واقع. إن شاء الله لما يموت ويجوا يحاسبوه يقولوا له السيستم واقع ويقضي حياته كلها لا طايل جنة ولا نار. حمد الله ع السلامة يا هانم، كل سنة وانتي طيبة. ما لقيتش مدام تهاني على مكتبها، بس أخدت كبشة ملبس من اللي بتحطه قدامها للزباين. إوعى! جت عربية محل الجزارة، منظر يفور الدم: أربع عيال شحوطة كل واحد شايل كيس زبالة كبير مليان فلوس لتمة عينه. وعليكم السلام يا أستاذ، كل سنة وانت طيب. ولا مغارة علي بابا؛ يقفوا قدام المكنة، يقولوا كلمة السر، المكنة تطلع فلوس. أهم حاجة التباتة. كل ما أشوف حازم بيه بيشرب سيجارة اتراذل لحد ما يديني واحدة، أديها للواد سيد بتاع البوفيه علشان يرضى يشيل لي إزازة الميه في التلاجة، أو يجيب لي بواقي الغدا لما يطلبوا أكل. مدام سهى بتاكل أكل! بتطلب فطار وغدا وعشا. بقول لطيارين الدليفري إن ممنوع يدخلوا، وأدخل أنا بالأكل أديهولها وأقسم البقشيش بيني وبين الطيار من قبل ما أرجع له. بفلوسك وبمالك هتنول اللي في بالك.. وبالرذالة كمان. كل سنة وانت طيب يا دكتور!