جربت تموت ؟ !!..

عمرك فضلت تبص لحد بيتكلم .. بيتكلم بس و نفسك تحضن كل. كلمة و كل حرف بيقوله او مثلآ واقف بيشتري حاجة من مكان و بيدور على الفلوس في انهي جيب عشان يطلعهم موقف مالوش معنى بس بيلفت انتباهك تفاصيله و تفضل تبتسم بعبط من جوا قلبك و نفسك تبوسه عشان الحد ده هو كل السعادة ليك في الدنيا

لما بيسوق لما بيضحك لما بيتنرفز

لما يبقى مش طايقك بردو بتحبه 

او يمكن مش حب ماعرفش الحالة دي مش قادرة افسرها و لا افهمهما

عامة انا مش من الناس المؤمنين بإن في حاجة اسمها حب بالمعنى الرومانسي يعني 

الا نادر جدآ .. حاجة شبه منقرضة  

الحب ده حالة من الدهشة و الشغف مابيخلصوش 

اي علاقة بتمر بتلات مراحل 

مرحلة بيكون فيها الاتنين مش شايفين بعض و الدنيا والبشر الا من خلال بعض و مع بعض

مرحلة التعود يعني احنا مع بعض و مافيش حاجة جديدة مبهرة في العلاقة .. الشغف بيبقى خلص 

المرحلة الأخيرة دايمآ هي اللي بتبقى الفيصل اللي بيأكد ان ده فعلآ حب 

مرحلة الملل و الفتور و الزهق 

لما الواحد بيبقى قاعد جنبك و انت مش شايفه 

لما بتحاول تتهرب من التواجد معاه فترات اطول عشان ترتاح و تلاقي نفسك تاني 

انا رغم كل السنين دي لسة ماوصلتش للمرحلة الأخيرة مع مراد .. 

ازاي حد بعد كل التوحد الروحي والوجداني ده يقدر يفكك نفسه من الآخر و يسيب

كل حاجة في البيت اخترناها سوا لون الحيطان دي مع ان الشقة صغيرة بس كانت بتسر اي حد يزورنا و تبهجه .. السجاجيد و الفرش كلها اخترتها على ذوقه عشان يبقى مرتاح في اي حتة يكون فيها .. على دوقي انا ؟؟ مش مهم دوقي خالص .. 

انا لسة فاكرة لحد دلوقتي اول ما دخل مراد المستشفى بعد الحادثة الفظيعة اللي حصلت في طريق مصر اسكندرية 

لما الدكتور بيقولي ادعي و بس

فضلت واقفة ف مكاني و كأن الزمن والدنيا و المجرة كلها بطلت تلف

 ازاي يعني للحظة ممكن يغيب عن حياتي ؟ مالهاش معنى بعد كدة 

انا بجد ماليش حد وسط كل الناس دي غيره هو 

وبكل بساطة ييجي عليا يوم و يقولي انا ماشي 

-فين يا مراد ماشي فين 

-احنا خلاص الحياة بينا تقريبآ انتهت بقالها شوية 

– انتهت ازاي يعني

– بصي يا هدى انتي اكيد حاسة بس بتحاولي تكدبي على نفسك 

احنا عمليآ مبقاش بينا اي حاجة غير علاقة شكلية قدام الناس 

صدقيني حاولت افهم اللي بيحصل بس مش قادر 

انا كان ممكن اختلق اي سبب كبير عشان نفترق بس عشان العشرة لازم اتكلم معاكي بصراحة 

السبب الحقيقي مش موجود بس هو احساس فاضي من جوايا كل يوم بيكبر و انتي مش بتمليه انتي بتبعدي كل ما بيكبر و بيغطيكي .،

انا كنت سامعة كل كلمة بيقولهالي و حافظاها بس دماغي مش قادر يستوعب ان الكلام ده حقيقي في دوشة بتغطي على صوته دوشة صوت فرحتي يوم فرحي و الزفة دوشة حفلة رسالته للدكتوراة اللي خدها و دوشة سبوع ابننا

دموعي خنقتني

-طيب يمكن انا اكيد قصرت يا مراد حنحاول نلاقي طريقة نغير بيها طريقة حياتنا 
بس انا قصرت فإيه  

يااااه انا حاسة اني ماعرفش نفسي حتى 

انا مابقيتش فاكرة تفاصيل حياتي على قد ما كنت عايشاله حياته هو 

 ………………..

انا مش فاكر امتى اخر مرة حسيت اي مشاعر مميزة تجاه هدى 

مش قادر افهم ازاي وصلت للمرحلة دي ؟! زي ما يكون حد دخلتي مكنة تجفيف و نشف كل قطرة احساس كانت جوايا لهدى 

و خرجت جاف تمامآ .. الإحساس الجليدي ده لما ببصلها عنيا مش بترق و قلبي مش بتحرك ..مش شايف واحدة حبيتها شايف واحدة اعرفها و بس ..وساعات بسأل عي مين دي ؟؟!!

 بيصعب عليا أيامنا الحلوة آه بس لما بسترجع الذكريات مافيش حاجة بتحركني تاني . رقتها و كلامها و انوثتها شعرها الإسود الجميل بالنسبة لي تلاشت و بقت حاجة بعيدة عن اني اشوفها .. مخلوق مطموس المعالم . 

كأني ميت ،.. 

انا ماشي يا هدى 

سمعتها بتلاحقني بكلام ممل و رتيب ازاي و ليه و نحاول نصلح و انا عملت ايه ؟؟ 

كلام فارغ !. هي مش فاهمة ان المشاعر دي مالهاش خط رجعة المشاعر بتستعمل مرة واحدة disposable يعني 

ماينفعش اعادة استخدام او تدوير لو اترمت بتبقى للأبد في النفايات ..

……………

طيب يا مراد اللي تشوفه بس عشاني بيت الليلة دي هنا الدنيا برد برا و بكرا الصبح لو سمحت جيب وليد من عند ماما عشان بيته عندها .. و ابقى اعمل اللي انت عايزه طالما ده قرارك….

استأذنك انا حنام في اوضته تصبح على خير يا مراد… .

قلبي مليان دم و بتختقني احاسيس مفزعة و فظيعة مش شايفة قدامي و لا مستوعبة انه ينفع يكون مع حد غيري و لا انا ينفع .. بيتهيألي اني نفسي اولع فيه و في البلد كلها … انا بجد مخنوقة و مش قادرة اتنفس … 

لا حول و لا قوة الا بالله شفة الاستاذ مراد ولعت يا جماعة ده اكيد ماس كهربائي .. هما كلهم كانوا حوا ؟ بيتهيألي هدى و مراد بس 

يا حبيبتي يا هدى ابنك حتسيبيه لمين ….
عبير